Subvencións, en réxime de concorrencia non competitiva, para a execución de actuacións para reducir as infiltracións nas redes de saneamento municipais en concellos da Comunidade Autónoma de Galicia

Augas de Galicia

Resolución do 28 de marzo de 2025 pola que se aproban as bases reguladoras para a concesión de subvencións, en réxime de concorrencia non competitiva, para a execución de actuacións para reducir as infiltracións nas redes de saneamento municipais en concellos da Comunidade Autónoma de Galicia, no marco do Plan de recuperación, transformación e resiliencia, financiado pola Unión Europea-NextGenerationEU, e se procede á súa convocatoria para o ano 2025 con carácter plurianual (código de procedemento AU300D).

BDNS (Identif.): 826195.

Obxecto

Establecer as bases reguladoras para a concesión de subvencións, en réxime de concorrencia non competitiva, para a execución de actuacións para reducir as infiltracións nas redes de saneamento municipais en concellos da Comunidade Autónoma de Galicia, no marco do Plan de recuperación, transformación e resiliencia, financiado pola Unión Europea-NextGenerationEU, e convocar estas subvencións para o ano 2025 (código de procedemento AU300D).

Entidades beneficiarias

Poderán ser entidades beneficiarias destas subvencións os concellos responsables de sistemas de abastecemento que dean servizo a unha poboación inferior a 20.000 habitantes.

Importe

As subvencións reguladas ao abeiro desta resolución financiaranse con cargo á conta financeira 6566 (subvencións de capital a corporacións locais) da entidade pública empresarial Augas de Galicia, por un importe dun millón de euros (1.000.000 €) con cargo á anualidade 2025 e un millón cincocentos mil euros (1.500.000 €) con cargo á anualidade 2026, con fondos procedentes do MRR, no marco do Plan de recuperación, transformación e resiliencia, financiado pola UE-NextGenerationEU.

O importe das subvencións será do 100 % do investimento da actuación proposta, excluído o imposto sobre o valor engadido, co límite máximo de corenta e cinco mil euros (45.000,00 €) por solicitude, ata esgotar o crédito dispoñible previsto na resolución.

Actuacións subvencionables

1. Serán subvencionables os investimentos realizados desde a data de publicación desta convocatoria de subvencións destinados á execución das actuacións incluídas na auditoría municipal das redes de saneamento que teña aprobada a entidade local, sempre que se cumpran os seguintes requisitos:

a) A auditoría municipal da rede de saneamento aprobada polo concello debe contar cun plan de actuación para reducir as infiltracións na rede de saneamento municipal en que se recompile toda a información xerada, a análise e interpretación dos resultados obtidos, o inventario das deficiencias detectadas e as propostas de medidas correctoras para a súa emenda, priorizadas e valoradas técnica e economicamente.

b) As actuacións propostas deben recoller, como mínimo, que un 15 % do importe subvencionado será destinado a investimentos que permitan mellorar a xestión dixital do ciclo urbano da auga e un mellor control e calidade das augas nas verteduras de augas residuais, aínda que esta previsión para a mellora da xestión dixital non estivera recollida no plan de actuación para reducir as infiltracións na rede de saneamento.

Estes investimentos que permitan mellorar a xestión dixital do ciclo urbano da auga e un mellor control e calidade das augas nas verteduras de augas residuais poden ser, entre outros, do seguinte tipo: execución de actuacións que melloren a eficiencia e a monitorización do sistema, tales como instalación de medidores de caudal, sondas e/ou sensores para a medición de parámetros de calidade como pH, condutividade, turbidez, etc. que permitan identificar os puntos críticos do sistema e aqueles en que se precisa ter unha maior información e control; sensores de alivio; actuacións que melloren o coñecemento do sistema, tales como a elaboración de cartografía nun sistema de información xeográfica, a modelización hidráulica, modelación building information modeling (BIM), etc.; instalación ou mellora de sistemas de comunicación necesarios para unha mellor xestión do ciclo urbano da auga; elaboración, actualización ou mellora de plataformas, portais web ou sistemas de información que fomenten a comunicación dixital cos usuarios e a telexestión e telemando das instalacións.

2. Subvencionaranse tanto os investimentos realizados na execución de obras, como os gastos asociados a estas: honorarios de redacción do documento técnico, honorarios en materia de actividades preventivas e accións de coordinación empresarial e honorarios na dirección dos traballos; o total dos honorarios pode ser de ata un máximo do 10 % da subvención.

3. En ningún caso se considerará gasto subvencionable, ademais dos gastos recollidos no artigo 29 da Lei 9/2007, do 13 de xuño, de subvencións de Galicia, o imposto sobre o valor engadido ou outros impostos indirectos.

Prazo de presentación de solicitudes

O prazo de presentación de solicitudes comezará ás 9.00 horas do día 23 de abril de 2025 e rematará ás 14.00 horas do día 23 de maio de 2025.

Máis Información

-Na Base de datos nacional de subvencións (BDNS Identif.: 826195): https://www.infosubvenciones.es/bdnstrans/GE/es/convocatoria/826195

-Na páxina web oficial de Augas de Galicia: https://augasdegalicia.xunta.gal

-DOG Nº: 71 (public. 11/04/2025): https://www.xunta.gal/dog/Publicados/2025/20250411/AnuncioO143-010425-0002_gl.pdf